Ang Nasaag Sa Disyerto

Usa ka biyahero nasaag sa disyerto. Natanggong siya sa disyerto ug mga pila ka adlaw nga way makaon, way ma-inum ug way ideya kon asa siya paingon.

Sa ika lima ka adlaw nahulog siya sa kamelyo nga iyang gisakyan. Swerte, usa ka arabo nga magpapastol ang niduol kaniya samtang hapit na siya mamatay kay nakabsan ug tubig sa lawas, gilibutan usab kini ug mga hubag-hubag.

Gidala ang wa nakamatngon nga biyahero sa tulda sa arabo kon diin ato-a ang asawa niya nga arabyana. Gilimpiyohan siya, gipakaon hangtud nga na-uli.

Pagkahuman sa pipila ka adlaw gikan sa ilang pag-atiman sa biyahero, ang biyahero makahimo na sa pagtindog ug sa paglakaw-lakaw sa maong tulda.

Kada adlaw pagadalhon sa arabo ang mga kanding sa bungtud sa disyerto aron ipastol samtang ang iyang asawa nagpabilin sa tulda aron sa pagbuhat sa buluhaton sa balay.

Usa ka adlaw gipanuwayan ang biyahero nga makighilawas sa arabyana. Nisukol kini ug nidagan paingon sa bungtud ug gisuginlan niya ang iyang bana sa nahitabo. Sa pagsugilon niya niini, wala lang panumbalinga sa maong bana.

Sa pagbiya na sa maong biyahero balik sa iyang tribo, nagpatudlo siya sa arabo sa maong direksyon. Matud pa niya, daghan salamat sa pag-atiman kanako. Kon mo-abot nako sa akong mga tawo,unsa man ang buot nimo nga akong i-sulti kanila? Ang tubag sa maong arabo, sultihi ang imong mga tawo kon unsa ang among gibuhat kanimo ug sultihi usab sila kon unsay imong gibawos kanamo.
(Katapusan)

Hahaha.... sori. ambot sugilanon ba ni akong nasuwat o dyok?
Giganahan lang ko ug hadla sa akong huna-huna. :))

Bayot Diay

Aduna koy buot i-sugilon kaninyo mahitungod kanako ug sa akong amahan.Dili ug dili ko gyud makalimtan adtong gabhi-ona. Makusog ang uwan ug ma-igang ang huyop sa hangin.

Nagsudlay-sudlay ko sa akong kwarto kay bag-o pa lang ko nahuman ug kaligo ug nagtapis lang sa akong tuwalya.Nadungog nako ang mga tuktok ni tatay sa akong pultahan.Sa gitubag na nako ang maong mga tuktok, matud ni tatay nga kinahanglan mag-istorya ming duha ug pasudlon nako siya sa akong kwarto. Gi-ablihan nako ang pultahan ug nagdali kini nga nisulod sa akong kwarto.

Pagkadako sa akong kakugang nga gisirad-an niya ang pultahan. Gihawiran ni tatay ang akong mga kamot ug gihapyod-hapyod niya ang akong buhok, pinaagi sa iyang mga kamot,sa akong kilay, sa akong nawong paingon sa akong ngabil. Nakasyagit ko.Tay!Tay! Ayaw, maluoy ka! Ako ang imong anak! Utang buot Tay! Apan mura'g wa gihapon si tatay nga nadungog.

Gipadayon lang gihapon niya ang iyang gibuhat. Gipiyong ko na lang ang akong mga mata kay di ko gusto nga makakita sa panagway sa akong amahan samtang nagapadayon siya sa iyang gibuhat dinhi kanako.

Nadungog nako si nanay nga nagpahisyagit samtang pagapugson pag-abli ang maong pultahan. Ablihi ang pultahan! Ayaw ka na pagbuhata sa imong anak! Ayaw paggub-a ang iyang kaugmaon!

Bisan pa man, wa pa gihapon nahimo si nanay, wa usab siya paminawa ni tatay. Nagpabilin na lamang ako nga way kabangka-agan ug gipasagdan na lang ang akong kaugalingon sa bisan unsay gusto buhaton ni tatay.

Paglabay na sa pipila ka oras, nihunong na si tatay. Gipa-atubang ko niya sa espiho ug dako na lang ang akong katingala ug kakurat sa akong nakita, maayo man diay mo-makeup si tatay.

Sukad ni-adtong gabhi-ona, ni-angkon kanako ang akong amahan nga usa siya ka bakla. Dako kaayo ang akong kalipay sa pagkadungog ko niini. Kay nasayran na nako ang matuod ang dugay na niyang gitago kanako. Mao na lang ang nisantop sa akong huna-huna nga malipay na gyud ang akong uyab kay nisamot na ang akong ka-anyag. Gigakos nako si tatay ug pareho ming duha nagpangluha sa kalipay. Malipayon na kami karon ug
nagpakabuhi nga malinawon. (Katapusan)

Bisan Ang kalibutan Magdumili

(Ang kining maong sugilanon usa ka mugna sa huna-huna lamang.)

Si Lorena usa ka babaye nga taga probinsya. Usa ka anak kon kinsa ang mga ginikanan
mag-uuma. Siya nagdako nga usa ka kabus. Nag-eskwela sa usa ka publiko nga tungha-an ug nilampos kini kutob ra sa high school. Mao nakadesider siya nga molangyaw na lang sa Manila kay aron sa pagpanimpalad.

Nay ug Tay, nga nagpanagana nga mosanghid sa iyang mga ginikanan. Ngano anak?Pangutana sa inahan nga dako ug katingala samtang nagkalingaw kini ug digamo alang sa ilang ipani-udto. Kanang naa unta koy buot i-sanghid kaninyo ni tatay nay. Gusto unta ko nga molangyaw sa Manila aron manimpalad. Sige na gud nay, tugti lang gud ko aron mahaw-as ko kamo ni tatay sa atong kalisud. Apan anak, di ti-aw ang molangyaw sa Manila kay kini usa ka dakong syudad, unya kon ma-unsa pa lang ka didto, wa mi ni tatay nimo.

Anak, tubag ni tatay samtang nagkalingaw ug haros sa dahon sa kamunggay.Unsa man ang nakaon nimo ngano nakahuna-huna man ka ug panglangyaw? Wa ba diay ka mokontento sa atong pagkabutang dinhi sa bukid? Oo, tinuod kabus lang ta apan, malipayon na kami ni nanay nimo nga nagkahi-usa tang tanan. Kon molangyaw ka sa layo,wa ta kabalo kon unsay palad nimo sa Manila.

Tuod man,nilangyaw gyud si Lorena sa Manila ug nisulod pagkatindera.Usa sa mga pumapalit iyang nakahimamat nga atong nganlan ug Berting. Si Berting usa ka bugtong apo nga adunahan nga inila sa maong dapit. Nag-eskwela sa Manila sa kurso nga nursing. Wa damha si Berting nipadayag ug gugma kang Lorena. Wa palabya ang higayon nga higugmaon ni Lorena si Berting tungod kay kini gawas nga adunahan, ambungan usab. Si Berting ang una nga hinigugma ni Lorena ug sa huna-huna niya mahaw-as na gyud siya sa maong kalisud.

Wa nadugay sa ilang panaghigugma-ay, nakahukom si Berting nga tabanon na lang si Lorena. Sigurado ka Berting? Mag-unsa na lang ang imong pagtuon? Ayaw ko paghuna-huna-a Lorena ang importante wa nay lain pa nga maka-angkon kanimo kon di ako lang. Tuod man, nikuyog si Lorena kang Berting bit-bit ang iyang mga sapot paingon sa dapit ni Berting.

Pag-abot nila sa lugar ni Berting, dayon kini iyang gipa-ila-ila sa iyang lola nga mata pobre. Matud pa ni Berting, Lola, ani-a si Lorena nga akong hinigugma. Dayon pangayo ni Lorena ug pangatahuran sa lola ni Berting. Matud pa ni Lorena, maayong adlaw kanimo senyora, dayon kab-ot sa maong kamot kay mo-amin. Apan gidumili ang pagpa-amin sa maong senyora ug giwakli kini ang kamot ni Lorena. Si kinsa ka man nga mo-amin kanako? Unsay nakaayo sa akong adlaw? Wa ba ninyo huna-huna-a kon unsa kining inyong gibuhat? Ikaw Berting mag-unsa na lang ang imong pagtuon? Karon mamili ka ang imong pagtuon o kining bayhana? Hoy, ikaw babaye, pauli sa imong gigikanan kay wa kay katungod sa akong apo. Di mo ug bagay kay ikaw usa lang ka mocha-cha, gawas pa ni-ana, aduna na akoy babaye nga gitagana alang sa akong apo.

Apan Lola, si Lorena lang ang akong gihigugma tubag ni Berting sa pagpanilipod sa gugma niya kay Lorena. Basta dili ug dili ko gyud madawat kining bayhana nga mahimong kapikas sa imong kinabuhi. Kay siya di bagay sa atong pamilya kwarta lang ang gi-apas niya kanimo Berting.

Tuod man, tungod sa kasakit sa mga pulong sa senyora nga nadungog ni Lorena, wa kini
paghunong sa pagbakho ug sa walay langan nananghid na lang siya kang Berting nga mopahilayo na lang sa maong dapit. Dili ko motugot nga mopahilayo ka kanako Lorena, gihigugma ko ikaw. Di ko igsapayan ang mga bahandi kon mawala ka kanako. Tuo kanako mahal ko. Kon tinuod nga nahigugma ka kanako mag-unong tang duha. Ayaw kana buhata Berting total mga bata pa tang duha. Padayon usa sa imong pagtuon kay mopadayon usab ako sa pagpanimpalad.

Apan nipadayon gyud sa pagpahilayo si Lorena sa dapit ni Berting bisan sakit sa iyang dughan. Pasaylo-a ako Berting, apan mao lang kini ang angay nga buhaton ko ang pagpahilayo kanimo alang-alang sa imong maayong ugma.

Pagkahuman sa mga ka mga katuigan ang nilabay, si Lorena tungod sa iyang pagpaningkamot kalit lang kini ni-asenso ug nakatukod ug kaugalingon nga kompanya. Sa paggawas ni Lorena paingon sa iyang kotse, nipaharurot kini sa pagdrayb ug kalit kini mihunong sa stop light ug sa paglingi niya, mura'g nakaila ko ni-anang tawhana sa sulod ni-anang kotse. Wa damha nagkatagbo ang ilang mga mata ni Berting ug nagkatinutukay silang duha? Berting? Ikaw na? Lorena? Ikaw? OO, Berting ako kini si Lorena. Kumusta ka na? Okay lang hangtud karon ikaw pa gihapon ang akong gihigugma Lorena. Mao usab ako Berting, way lain akong gihigugma kon di ikaw lang.

Mao kadto nakahukom sila nga magpakasal ug wa nay lain nga makababag pa. Si Lorena nadawat ra sa lola ni Berting nga mahimong kapikas sa iyang kinabuhi. Si Berting ug Lorena nadayon ra gyud ang ilang usa ka engrande nga kasal ug sukad ni-adtong higayuna nagmalipayon na ang ilang pagpuyo isip usa ka pamilya. (katapusan)

Alang Kanimo

Sa una ta ka nga nahimamat
Didto mismo sa dagitwanang
Nakaingon na ko daan
nga ikaw mahigalaon

Sa mga nanglabay nga mga adlaw
Sukad nga kita nagka-agbat sa tabi-anan
Nindot nga pagtinagdanay ang mitumaw
Kay ikaw maayo kaayo motagad

Nasayud na ko daan
nga ikaw maayong tawo
Pagkamalipayon ko
nga ikaw akong nahigala

Malingaw kaayo ko
samtang magtabi tang duha
Kay luyo sa maong mga katawa
nakita nako nga matinud-anon ka

Pagkabulahan ko nga usa sa imong mga higala
Kay sa imong kama-ayo, ako malipayon
Ikaw angay lang gyud nga handumon
ug higala-on. :))

Ikaw ug Ako

Sa wa lang damha nga panghitabo
Luyo sa akong pag-inusara
Ang kaminghoy ang nakig-uban kanako.

Sa mga nanglabay nga mga katuigan
Ikaw ug ako nagka-agbat kay pagtugot sa panahon
Wa tuyo-a kitang duha nagkahimamat.

Sukad ni-adto kanunay ka nga nagasud-ong kanako
Kay ang kamingaw nagahari kon di ko nimo makit-an
Busa ang gugma ang nagtukmod kanimo ngari kanako.

Niining adlawa saksi ang langit ug yuta
Taliwa niining tanan kalipay man o kagul-anan
Ikaw ug ako alang lamang sa usag-usa.