Bag-ong Tuig

Wa lang damha ni-abot na usab ang Bag-ong Tuig. Mura'g bag-o pa lang gani ko nagpatindog sa Krismas tri, Bag-ong Tuig na usab. Sigurado gyud ko aduna na usab mga bag-o nga mga kasinati-an niining tuiga nga ma-agian.

Buot ko unta sulayan kining gitawag ug new year resolution, apan gihuna-huna nako kon buot gyud ko nga adunay usbon sa akong kaugalingon, ngano man nga mohulat pa man ko ug Bag-ong Tuig, di ba? Bisan unsang adlawa pwede man ko magbag-o sa angay nga pangbag-ohon.

Siguro kon naa man gani angay usbon sa akong kaugalingon usa na kini akong panagway kay mura'g nawong ug Gorella. nyahahaha... Mao nay gitawag nga kon magtalikod daw mura'g berhen, apan kon mag-atubang mura'g sigbin. Hehehe... Kamo pod dyok ra na uy, tuo dayon. huh!

Sa tan-aw nako bisan pangit akong panagway, di ko na igsapayan kay alang kanako gwapa na ko. Hehehe... Kay way mga binuhat ang Ginoo nga pangit. Ang tanan mga maanyag. Mag-unsa man na ang gwapa kon bati ug batasan di ba? Di kasak-an ug silingan.

Hmmm.... unsa pa ba angayan nako nga usbon? Siguro ang batasan no? Oist, kay unsa man diay akong batasan bati ba? Hala bahala na mo kon unsay naa sa inyong huna-huna. Basta ako kontento na ko kon unsa man ko nga pagka-ako. Mao nay gi-ingon nga maotro pay nawong nungka ang batasan. nyahahaha...

Magpalain na pod ko ug hisgutan. Adto bayang Bag-ong Tuig wa ko kasabot sa akong gibati kay naay takna sa pagmaya ug naa usab takna sa pagkaguol. Kay makadumdum man gud ko dayon sa Pinas nga mas sadya didto kon Bag-ong Tuig. Pastilan, pagkasadya gyud kay daghan mga pabuto ug mga nagkalain-lain nga mga porma sa kuwitis.

Ang ako lang gibuhat adtong Bag-ong Tuig mao lamang ang pag-andam sa mga prutas nga mga lingin kay matud pa nagdala daw kini ug swerte. Nagbutang ug ubay-ubay nga mga sensilyo sa mga bulsa ug gi-uyog-uyog, unya ubay-ubay usab ang naa sa pitaka aron di kuno makabsan. Hala tuo na lang mo aron ta madali. Pero swerte kaayo ko kay giregalohan ko ug kwarta nga gisulod sa sobre kay regalo sa Bag-ong Tuig. O di, na dugangan na nuon kay di lang mga sensilyo,naa pay pakapin nga mga papel. Mao toy giingon sa tinagalog pa nga hulog ng langit.

Ang pinaka kataw-anan kay bisan tingtugnaw na diri sa akong nahimutangan, nabuhat pa gyud nako ang pagpangabli ug mga bintana kay buot lagi nako sugaton ang maong Bag-ong Tuig. Tan-awa lagi sa akong pagpangabli, nagkirig-kirig na nuon ko sa katugnaw. Pero okay ra to kay nakapajama naman nuon ko.

Pero kadtong akong binuhatan sa bata pa ko nga kon Bag-ong Tuig kinahanglan maglukso-lukso aron motubo, unya pislit-pisliton ang ilong aron motaas kuno, wa na nako buhata kay binuang na uy. Sigurado gyud ko nga di na ko motubo kay kon sa baboy pa nikubol na hagbay ra. nyahahaha... Kon pislit-pisliton ko usab akong ilong, mura man ug wa na usab, pango pa man gihapon as ever. Hahahaha... Di nako ni ikauwaw akong ilong bisan pango kay mao man ni ang magpamatuod nga ako usa ka bisdak.

Karon kay tuig 2009 naman ta. Magpaabot na lang ko kon unsa pay mga bag-ong kasinati-an nga mo-abot sa akong kinabuhi. Pwede naa, pwede pod ug wa gud. Sige lang kay kon naa man gani, suginlan ta ra mo. Maayong Bag-ong Tuig Higala!